退伍軍人卡成為「白老鼠」
英国政府正式推出数字版退伍军人卡（Veteran Card），作为测试政府新数字身分识别系统（Digital ID Scheme）第一步。由10月17号起，大约180万人可以经手机应用程式领取呢张卡。
目前退伍军人一直都可以用实体卡去证明自己服役身份，以方便获得慈善组织服务、购物优惠同埋部分公共服务。新推出嘅数字版除咗具备同样功能，仲会成为政府计划中多个“官方数字凭证”嘅第一个示范项目。
目標係簡化公共服務
政府话，未来仲会陆续推出数字驾照等项目，希望到2027年底前，所有政府签发嘅凭证——包括犯罪记录检查（DBS check）——都可以选择用数字形式。
不過，有議員同私隱團體就擔心，數據集中會增加監控風險，亦可能被濫用。已经有超过290万人签署请愿要求撤回。
科技部长Liz Kendall反驳话，外界有“过度恐慌”，强调系统唔会追踪个人行踪，亦唔会建立任何中央数据库。佢解释话，数字凭证会经由政府嘅 Gov.uk One Login 应用发放，资料会以加密方式储存在用户手机入面，要用面部识别或者指纹先可以开启，安全性比纸本更高。
另外，每个凭证嘅资料都会由原本发证机构独立保存，例如退伍军人卡嘅资料由国防部管理，而唔会集中放喺一个“黑客蜜罐”数据库入面。
即使咁样，保守党、自由民主党同苏格兰民族党都表示反对。工党内部都有异议，议员Richard Burgon直斥呢个系统“威胁公民自由同数据安全”，仲担心英国人嘅资料会畀外国科企接触。
Kendall回应话，政府绝对唔会将人民嘅生活资讯畀数字身分系统存取，亦唔会畀警察要求市民随身携带数字身份证。佢强调系统由政府内部数字服务部门自行开发，预计总成本约十亿英镑。