英國政府宣布一項重大警務改革，計劃成立一個全新嘅全國性警察機構，暫名為 「國家警察局」（National Police Service），又被形容為 「英版FBI」，專責調查恐怖主義、詐騙、網上兒童虐待、有組織罪案等複雜嚴重犯罪。
內政大臣沙巴娜·馬哈穆德表示，現時嘅警務模式係為舊世紀設計，面對現代跨境及高科技犯罪已不足夠。新成立嘅國家警察局會引入世界級人才同先進科技，包括為全國警隊推展面部識別系統等設備，好讓警方更有效追緝危險罪犯。
國家警察局會將現有職能整合落一個中央體系，包括國家打擊犯罪局、反恐警務、區域有組織罪案單位、全國道路警務同警用直升機隊等。英國政府表示，呢個改革可以減輕地方警隊負擔，令佢哋可以將更多資源同時間用喺社區日常治安上，好似反社會行為、商店行窃同電話盜竊等問題。
新機構將由一名 國家警察專員 帶領，成為全國最高級別嘅警務首長，而唔再係由倫敦警察廳長擔任最高執法官。政府亦會統一制定專業標準及訓練要求，確保全英各地警員執法水平一致。
政府指出有關改革係 近兩百年來最大規模嘅警務變革之一，計劃涵蓋英格蘭同威爾斯地區，並將逐步推行，詳細方案預計喺未來一份白皮書中公布。