「我已經忘記咗喺戶外係咩感覺。」29歲女病人Hollie Allan被醫護人員連人帶床推上醫院天台一刻，陽光照到面上，佢即時眼泛淚光，忍唔住當場喊出嚟。
位於倫敦南部的King’s College Hospital近日啟用全英首個深切治療部（ICU）天台病房，專門畀重症病人喺安全情況下接觸陽光、空氣同自然環境。Hollie成為首位體驗病人。
當升降機門打開一刻，久違嘅陽光灑落面上，原本虛弱躺喺病床上的Hollie即時露出笑容，但隨即感動落淚。
「對唔住，真係好舒服，好靚。」佢一邊抹眼淚一邊話：「我已經唔記得咗喺戶外係點樣。」
雖然身上仍然插住餵食喉及生命維持設備，但佢終於可以再一次望到藍天。
苦候換心手術 長期困ICU
Hollie正等候一項關鍵心臟手術。事實上，即使入院前，佢已經病到難以外出，而入住ICU後更加足足兩個月未曾踏出病房一步。
長期困喺病房令佢身心俱疲。
「日日困喺室內，你會慢慢失去重返正常生活嘅動力。」
「有時真係會攰，攰到唔想再繼續搏鬥落去。」
不過坐喺天台花園病房後，佢心情明顯好轉，甚至笑言：「就算而家落雷暴，我都想留喺度。」
全英首創 ICU病床可直接駁氧氣
新設施位於醫院五樓天台，可同時容納六名重症病人。
每個病床位置旁邊都設有防水設備箱，提供氧氣及電力供應，即使病人需要呼吸機或其他維生儀器，亦可以安全留喺戶外。
病區上方設有大型帳篷式頂蓋，既能遮風擋雨，又保留自然光線及戶外環境。
院方表示，研究顯示接觸自然環境及新鮮空氣，有助改善病人心理健康，甚至可能縮短住院時間。不過以往一般醫院花園難以照顧重症病人，因此深切治療患者往往無法受惠。
醫生：唔止救命 仲要幫病人重返人生
ICU顧問醫生Phil Hopkins表示，長期住院會令人逐漸同現實世界脫節。
「我哋唔單止想救病人條命。」
「我哋更希望盡快幫佢哋重返自己原本嘅人生。」
醫療團隊將會追蹤病人嘅心跳、呼吸頻率及疼痛程度，研究戶外治療對康復進度有幾大幫助。
花香、薰衣草、忍冬花圍繞病床
天台花園由園藝設計師Sarah Price設計，種滿薰衣草、茉莉花、忍冬花等芳香植物，病人即使瞓喺床上，都可以聞到花香、觸摸植物葉片。
Price表示，自然環境會令人不自覺放鬆下來。
「你唔單止見到病人面容改變。」
「連佢哋呼吸嘅方式都會改變。」
耗資逾2,000萬港元 NHS擬全國推廣
整個天台病房及花園工程耗資超過200萬英鎊，資金來自醫院慈善基金。
醫院行政總裁Clive Kay表示，希望項目除咗改善病人體驗外，更能縮短病人入住ICU時間，提升病床流轉效率。
如果成效理想，未來有望推廣至整個National Health Service系統其他醫院。
有醫護人員坦言，長年面對生死壓力嘅ICU員工，同樣可以利用天台空間休息喘息，對前線醫護亦是一種治療。