金融監管機構證實，英國現行100英鎊拍卡（contactless）消費上限，最快由明年3月起有機會取消，或者改由銀行同用戶自行決定。
英國金融行為監管局（FCA）表示，屆時銀行同信用卡發卡機構，可以自行設定每次拍卡嘅最高金額，甚至容許無上限拍卡，而毋須輸入四位數字嘅PIN碼。同時，FCA 亦鼓勵銀行容許客戶自行設定個人拍卡上限，又或者一鍵關閉拍卡功能，其實目前已經有部分銀行提供相關選項。
不過，FCA 同時承認，根據佢哋自己早前做嘅諮詢調查，市民對放寬100鎊上限其實興趣唔大。有78%受訪消費者表示，並唔希望現行上限有任何改變。
FCA 強調，3月起只是提供彈性，並唔代表銀行一定會即時提高或取消上限。
拍卡上限自2007年推出以來多次上調，由最初嘅10鎊，逐步升至15鎊、20鎊、30鎊；新冠疫情期間再跳升至45鎊，並於2021年10月提高至現時嘅100鎊。
目前如果用手機支付，例如Apple Pay或Google Pay，其實已經無金額上限，因為有指紋、面容辨識等內置保安功能。
不過，有聲音擔心，如果實體卡都可以高額甚至無上限拍卡，會令盜卡同詐騙風險增加。亦有人擔心，過分方便會令消費者「唔覺唔覺洗多咗錢」，尤其係用信用卡、變相增加債務。
另外，關注家庭暴力及經濟剝削嘅團體警告，無上限拍卡可能令施暴者更容易掏空受害人戶口，而且會加快英國走向無現金社會，對依賴現金生活嘅弱勢群體不利。
FCA 回應指，即使出現拍卡詐騙，消費者仍然可以按規定獲得退款；而系統亦設有保障，例如連續拍卡後要求輸入PIN碼。
與此同時，為咗保障市民攞現金嘅需要，英國正推動「共享銀行中心」。負責保護全國現金使用嘅 Cash Access UK 表示，全國第200間銀行共享中心已經喺埃塞克斯郡正式啟用。