日本旅遊熱潮持續，不少港人去東京、大阪、京都當「返鄉下」。不過，有旅居日本超過10年的旅遊作者，近日在Facebook旅遊群組蒐集逾200名旅客經驗後發現，原來好多人去日本都會犯差唔多嘅錯，甚至有人直言「玩完仲攰過返工」。
據《商業內幕》報道，該名定居神戶的作者，在擁有約90萬會員的旅遊群組發問：「你去日本旅行犯過最大錯誤係咩？」結果大量網民留言分享血淚經驗，其中5大後悔位最多人提到。
■ 第一伏：為打卡而去旅行
最多人後悔嘅，就係「行程完全跟社交平台走」。不少人為咗影IG靚相，特登去伏見稻荷大社、嵐山竹林等爆紅景點，甚至凌晨4點半起身排隊影相，但最後發現現場依然逼爆遊客。
有人坦言，真正最難忘，反而係冇安排、隨便亂行亂食嘅時光。
■ 第二伏：貪心塞爆行程
好多第一次去日本嘅旅客，都想一星期內玩盡東京、京都、大阪、奈良甚至廣島，結果日日趕車，最後每個地方都只係「到此一遊」。
不少人事後認為，日本旅行最重要唔係去幾多地方，而係知道自己真正想體驗乜。
■ 第三伏：低估日本交通複雜程度
雖然日本鐵路出名準時方便，但大型車站對遊客依然極不友善。
例如新宿站超過200個出口，不少人一入去即迷路。有旅客更直言，自己買JR Pass後先發現根本搭唔回本。
由於JR Pass近年大幅加價，唔少人其實已經唔適合再買，只係「以前人人買，所以跟風買」。
■ 第四伏：以為自己好行得
另一個最多人中伏位，就係「完全低估日本有幾好行」。
不少旅客表示，每日動輒行1.5萬至2.5萬步，加上大量樓梯、斜路、神社石級，夜晚返酒店雙腳幾乎報廢。
尤其夏天高溫又濕熱，即使平時有做運動，都未必頂得順。
最多人建議嘅一件事，就係：一定要著舒服鞋。
■ 第五伏：把日本幻想得太浪漫
不少第一次去日本嘅旅客，都對櫻花季充滿幻想，但實際到埗後，熱門景點往往人山人海，酒店價格亦瘋狂暴升。
有網民直言：「現場同IG相差太遠。」
不少人最後認為，日本當然值得去，但如果過份追求「夢幻感」，反而更容易失望。