歐盟 4 月起推行入出境新制度（EES），要求非歐盟旅客入境時要影相＋指紋，程序繁複，被外界批評勢令旅客大排長龍。不過希臘就「另起爐灶」，公開表示英國旅客毋須跟足新例做生物辨識，形同「自行其是」。
希臘旅遊局英國區主管 Skarveli 直言，做法是為咗避免英國旅客在機場塞爆，尤其夏季旺季，部分島嶼機場每日有二千幾名英國人落機，若全部要排隊按指紋、影相，後果不堪設想。
有旅遊專欄作者指出，以往希臘邊防查英國護照十幾秒搞掂；但若按新系統操作，時間可能激增五倍。希臘此舉被形容為「務實」，寧願同歐盟唱反調，都要保住旅遊收入。
另一方面，歐盟亦承認部分地點根本未準備好，包括英國境內三個「並置邊檢點」——多佛、福克斯通及倫敦聖潘克拉斯——仍未成功接通法國邊防系統，形同「未開得成機」。
希臘暫未公布豁免措施幾時完，外界估計至少會撐到夏季旺季後。有分析指，希臘今次「走先一步」，可能會逼到其他地中海國家跟隊。
