「外星人終於現身美國政府？」白宮近日突然推出神秘網站「Aliens.gov」，黑底綠字加駭客風科幻設計，首頁更大大隻字寫住「They walk among us（他們就在我們之中）」，瞬間嚇窒全網！
由於特朗普早前先講過，會公開UFO同外星人機密文件，因此網站一曝光，大批網民即時以為美國終於認咗有外星人存在，瘋狂湧入朝聖。
點知一路睇落去，真相竟然180度反轉——所謂「Aliens」，根本唔係ET，而係非法移民！
網站其實係美國移民與海關執法局（ICE）新搞作，專門公開拘捕非法移民資訊，仲鼓勵民眾舉報「可疑外國人」，玩到成個科幻陰謀網站咁，嚇到唔少人以為入錯暗網。
網站仲鬼鬼祟祟寫住：「60年來，美國一直隱藏秘密。Aliens一直生活喺我哋身邊。」
之後再補一句：「佢哋同你去同一間超市、同你小朋友返同一間學校、睇落同普通人無分別……只係，佢哋唔屬於呢度。」
成段文案陰森到爆，完全似外星生物入侵地球預告片。
再撳落去，更有即時數據顯示ICE已接觸超過310萬名非法移民，仲附送全美拘捕地圖，邊個州拉咗幾多人一清二楚。
最辣火頭係，網站仲直接放舉報表格，叫美國人檢舉身邊「可疑外國人」，即時惹來大量爭議。
有網民爆粗怒轟：「我以為終於公開51區秘密，點知原來係捉黑工廣告！」
亦有人批評白宮故意借UFO熱潮搞宣傳：「明知大家會誤會，仲整到成個外星網站咁款，根本玩心理戰！」
網站一出，即時洗版社交平台，再度引爆美國移民政策大戰。
https://x.com/WhiteHouse/status/2060127126611718214