英國老牌貴族百貨 Fortnum & Mason 又有新搞作！繼早前推出超浮誇餅乾天堂後，今個夏天再升級玩「水上High Tea」，豪搞泰晤士河私人遊船野餐，索價由1,000英鎊起跳，夠晒上流！
今次活動名為「Fortnum’s on Thames」，將於7月1日至12日期間舉行，配合 Henley Royal Regatta 同 Henley Festival 盛大登場。參加者可登上復古遊船「Christobel」，一邊慢遊泰晤士河，一邊歎三道菜豪華野餐加香檳，認真寫意！
船上裝潢走招牌薄荷綠貴氣路線，仲配上英倫條紋坐墊，影相打卡一流。至於食物方面，就有煙燻鱒魚配黑蒜忌廉、Fortnum招牌蘇格蘭蛋、芝士拼盤，以及接骨木花啫喱甜品等，全部由紅衣侍應親自奉上，完全唔使自己動手。
每次野餐可供4、6或8人包船，完成後仲可以拎走野餐袋做紀念。如果嫌未夠豪，仲可加錢升級香檳或英國氣泡酒，將「富豪feel」推到盡！
據報遊船會停泊於Henley-on-Thames附近，由當地船務公司接送，每日提供兩節時段，分別為上午11時半至下午1時半，以及下午3時至5時。
